Mar 8 | ASO | STEP | A'mine gameneu' nene evene' muki' gohi igi di gese' igi noso' nite' nomivo nizavo Izesu' aza izipahala zuho asi lo-ngemo ti' lo line':

Mark 8

Izesu' Evene' Fo Tauseni (4000) Noso' Nite' nGemavo Nani' Gamazi

(Mataio' 15:32-39)

1 A'mine gameneu' nene evene' muki' gohi igi di gese' igi noso' nite' nomivo nizavo Izesu' aza izipahala zuho asi lo-ngemo ti' lo line': 2 Mene aleve nene nazasi gamene sitohamo maka' minunidi'mo noso' nite'inesi nomivo engikumu' mulu'ne hukave. 3 Noso' nite' namavo numu'nida ngimiseleloni' nene akala vilizada ve'ine ga'ine monavo di'mozilisave. Linge ma nene aka hotati' nizave. 4 Lavo izipahala zuho ingine di velepe' izi ti' li li-imani': Ebe' hadivelo' mene evene' muki' mene noso' nite' nadi' ogo ngemelone. Noso' nite' dalone' akate nene ma nomive. 5 Likevo aza longo' o-ngedo line': Linginela sikoni nanike' neve. Longo' ogavo seveni ve lani'. 6 Ingine likevo evene' muki' misubolo' minilizave lo lo-ngedo sikoni seveni nene do O'moso opo'ni lo apilo ize' mili evene' ngimilizave lo izipahala zuho ngemavo ingine ize' mili evene' muki' ngimani'. 7 Alaha' ngomo ngomo ngomosi' minine' nesi nene do o'mosola lo a'minesi evene' ngimilizave line'. 8 Ne'mine ogavo ni gatu'ine ani'. Ne'mine igisa lumo hulani' nene gizeka' igi gosuvahaku' milikevo gosuvaha' seveni vai' line'. 9 Noso' nite' nave nene fo tauseni (4,000) ne'mine minani'. 10 Ido' evene' nene ngimisele hulo aza nene izipahala zuhosi geti sipiu' dizi Dalamanuta misubouko vani'.

Halisaio' Evene' Nete Izesu' Ato' Nite' Ma Do Soto' Ogavo Ningelone Lani' Gamazi

(Mataio' 16:1-4)

11 Vi nizavo Halisaio' evene' ingine igi ezesi gamazi gono di mini ei' nene nimiselive O'moso aza nenikisi neive line' nene lamine' lihe gosoho' lihe nemu' O'moso'mo amuzo emavo atoli'mine suno do soto' ogavo ningelone li emengu' mili lani'. 12 Ne'mine ikevo lulouko agae lo gelo ti' lo line': Lamineto' O'moso'mi amuzo gezela neingumu' nene gele ele'vole' oloningisi atoli'mine suno do soto' oganivo ningelone li idise mene gamenelo' nizave lingine laa' nani' nene nanimu' laa' nave. Naza mo lamineto' lo-lengemeloze. Idise gamenelo' nizani' aleve mene atoli'mine suno ne'mine nene mo keke' lengelebizamolosuve. 13 Ne'mine lo hulo-ngedo sipiu' dizo noso ohuno helala volosa aka api' ogo vine'.

Halisaio' Aleve Ido' Helode' Ve Engi' Monovo'nido' Nene Izipahala Zuholite E'metikelizave Lo Izesu' Aneza Gamazi Lo-ngimine' Gamazi

(Mataio' 16:5-12)

14 Ido' izipahala zuho nene beletimu' ga'ine molavo ma di vamavo beleti inginela ma minamidine'za hamokovo' nene sipiu' ma minine'. 15 Ne'mini nivavo Izesu' aza evene' maliti ngemeni dameni golosomu' beleti do lulu izaa' ine' inite' zisitilo' nene aneza gamazi lo molo ti' lo hungo' molo lo-ngimine': Halisaio' mono' laa' avelatikisi ido' Helodedatikisi zisiti nene dikelizave. Nemu' ningisa minilo. 16 Ne'mine lo lo-ngemavo ingine li volelo' melo' igi ti' li lani': Laza beleti ma do amune' nenako nemu' lave. 17 Likevo gelo Izesu' aza ti' lo lo-ngimine': Beleti di amani' nemu' nene nanimu' li volelo' melo' nave. Lingine olihe gili lamine' amahe. Lutine'mi gala nene ngolo' lamihe. 18 Vetine neine'za ningamahe. Gatine neine'za gilamahe. Gomu' nene evene' faef tauseni (5,000) engikumu' sikoni faef do gito apilo ngemekuvo nikevo lingine sikoni lumosama nedunu' nene gosuvaha' nanike' go'zi vai' lani' neve. Nee mamu' gatine molahe. Ne'mine lavo ingine ti' li lani': Gosuvaha' tuvelu (12) ve 20 likevo gohi ti' lo line': Ido' evene' fo tauseni (4,000) engikumu' sikoni seveni gito apilo ngemekuvo nikevo lingine sikoni lumosama hulani' nene gosuvaha' naba' naba nanike' go'zi vai' lani' neve. Lavo ingine gosuvaha' naba' naba seveni ve lani'. 21 Ne'mine likevo aza ti' lo lo-ngidine': Ido' lingine a'mine nemu' mo gili minani'za monovo'vemu' nene olihe gili lamine' ami naza beletimu' lokuvosa nilahe.

Izesu' Betesaida Numuda Vo Vele Likive Ma Do Lamine' O-dine' Gamazi

22 Neloti' nene vi Betesaida numuda hetelani'. Hetelikevo a'mida nene ve ma vele likive Izesuda ele'mizi igi oko'nolo' do gelelive li muheleka li longo' i-dani'. 23 Longo' i-dikevo aza vele likive'mi analo' do numuno ebe' heta vo veleu' gituho' ogo holo-do ana hitosa ti' lo longo' o-dine': Inite' noningabe. 24 Longo' o-davo aza vokene' ogo ningo ti' lo line': Evene' za gili vani' nene nimonavo noninguve. 25 Lavo Izesu' aza ana velelo' gohi hitavo ve aza vele do guno ningavo vele nene lamine' ogavo inite' muki' ningo ninge ngolo' line'. 26 Vele lamine' ogavo numu'vela imiselo ti' lo lo-dine': Luhuvo numuda nene vamo gei' numungala vo minezo.

Izesu' Nene O'moso'mo Do Lu' Izelive Lo Imiselelesa Live Ve Lo Petolo' Lo Soto Ine' Gamazi

(Mataio' 16:13-20; Luka' 9:18-21)

27 Ido' neloti' nene Izesu' aza izipahala zuhosi Kaesalea Hilipi ebeta luhuvo numuno mineka' mineka' ido' vani'. Akalo' olihe nivi Izesu' aza izipahala zuho ti' lo longo' o-ngidine': Evene' ingine nene nezemu' zaho ve li laa' nave. 28 Longo' o-ngedavo ingine ti' li li-imani': Evene' ma nete nene mono' noso holo-ngedaa' ive Zohane' nene hilinguti' otosa noloseive li laa' nave. Ido' linge ma nete nene gozopo' polohete Elia' aza gohi soto' oloseive lave ma nene tine' molo abe li laa' nave. Ido' linge ma nete nene gomu' minani' polohete hilani' linge engitati' otanive nolibe li laa' nave. 29 Ne'mine likevo Izesu' aza gohi ti' lo longo' o-ngidine': Ido' ingine nene mo ne'mine laa' nani'za lingine nenikumu' nene zaho neve li laa' nave. Ne'mine lavo Petolo' aza ti' lo line': Gaza nene O'moso'mo do lu' izeline lo gimiselelesa lo huko-gidive ma nene nane. 30 Ne'mine lavo ingine evene' masi masi a'mine monovo'vemu' li-ngimikelizave lo lo huko-ngidine' ve.

Izesu' Aza Bili Hililizani' Gamazi Lo-ngemosa Ve Ma Eze E'meti Nivi Mulumo Gono Gihilizangu' Olovo' Ilizado' I Minave Nene Minevo' Minevo' nGemeni Ma Damilisave Line'

(Mataio' 16:21-28; Luka' 9:22-27)

31 Ne'mine ogo Izesu' aza api' ogo gamazi ti' lo apize ngeme'mo vine': Neni' gono ne'mo gihile've do soto' ilingumu' O'mosolati' ve gihile neni' nene mulumo gono naba geho helosa gohi otelodo' o neine' nenako mono' gizebo vesi eveneto' medeli mini O'moso inite' lehizi daa' ave nabasi ido' Zuda vete gozopotati' laa' ani' mono' apizi ngimaa' ave nesi ingine mehe'ine nimi mulumo nite' muki' nimii nibili hilikevo helosa gamene seto hamo mino otelesuve. 32 Ne'mine lo a'mine gamazi nene lo lamino lo soto' ogosa lo ngolo' lo lo-ngimine'. Ne'mine lo lo-ngemavo Petolo' aza ele'mize gahevela ogo heleline' gamazi lingumu' nene elemelesa ine'za 33 Izesu' mine velepe' izo izipahala zuho vonu' ngebelo Petolo'ni elemo ti' lo line': Gaza gaka gele naine' nene O'moso'mo gilidi'mino gelamo asi me misubou' vete gilaa' adi'mino gele nange. Satani gaza aka'ne hize tilamo olovo' ozo.

34 Ti' lo evene' mukikisi izipahala zuhosi asi lo-ngedavo ezela igi di gese' ikevo ti' lo lo-ngimine': Ve ma ingine neni' ne'meto alone li gilii ma gomu' nene engi' minevo' alevo'ine gizebo iga' nani' monovo'ine nene huli alami neni' ne'metilizangumu' ve goloso nizave li lohoto' zalo' ngibili hililizangumu' nene gili hulisa ne'meti alizave. 35 Ido' ne'mine igisa ne'meti alizave lo noluvoni' nene nanitekumu' luhe. Lingine mene gililo: Ve ma ingine neni' ne'metelone' nene geni initeli'mi lulou' vo minevo' alevote hulalone li ne'metamilizave nene minevo' minevo' minaa' ngemeni dameni nene ma damilisave. Damilisaha ve ma ingine neni' gamazi'ne lamine' nene gili gili ele'vole' igi ne'metilizangumu' ngibili hilikevo minevo' alevo'ine hulilizani' nene alinge' minevo' minevo' minaa' ngemeni dameni nene ha dalisave. 36 Ee, evene' ma ingine minevo' minevo' minaa' ngemeni dameni ma hulilizani' nene a'mine ngemeni dameni gohi do engita olone li a'mido' golo hizilizani' inite' nene hamokisi ma minamoloseive. Nemu' nene evene' ma ingine misubouko mene minevo' alevo' igi mini misubou' inite' vai' nene di engita igi minilizangu' nene minevo' minevo' minaa' ngemeni'ine hulilizani' nene a'mine inite' vai' nete nene ma hize ele' i-ngidamilisave. 38 Ido' me misubou' minevo' alevo'inemu' gili neni' ne'metamilizave nene ingine minevo' minevo' minaa' ngemeni dameni nene ma damilisave noluvoni' nene ve ma ingine libilikevo minevo' alevote hulalone li a'mine O'moso huli lihime daa' akalo' vaa' nani' aleve engi' vovo'ningu' nene neni' gamazi'ne hize ele' oga' unive neni' evenele none lilisa ngovozo hililizani' nene O'mosolati' ve gihile naza me'nehi amuzo do ti' ogo ei' angelo' vesi alone' gamenela a'mine alevemu' nene neni' evene'ne nizave lolosa ingine adi'mino novozo helo lamuvo minevo' minevo' minaa' ngemeni dameni nene ma damilisave.